مقصد کا اندازہ حرکت سے

ایک دن لقمان ایک چشمے کے کنارے بیٹھے تھے۔ وہاں سے گزرنے والے ایک آدمی نے ان سے پوچھا:

"میں اگلے گاؤں تک کتنی دیر میں پہنچ جاؤں گا؟"

لقمان نے فرمایا:
"چلتے رہو۔"

وہ آدمی یہ سمجھا کہ شاید لقمان دیوانے ہیں، اس لیے وہ خاموشی سے چل پڑا۔

جب وہ کچھ قدم آگے بڑھ گیا تو لقمان نے بلند آواز سے کہا:

"اے آدمی! تم ایک گھنٹے بعد اُس گاؤں میں پہنچ جاؤ گے۔"

آدمی نے حیران ہو کر پوچھا:
"یہ بات آپ نے پہلے کیوں نہ بتائی؟"

لقمان نے جواب دیا:
"کیونکہ میں نے تمہارا چلنا نہیں دیکھا تھا۔ مجھے معلوم نہیں تھا کہ تم تیز چلتے ہو یا آہستہ۔ اب جب میں نے تمہاری رفتار دیکھ لی تو جان گیا کہ تم ایک گھنٹے میں وہاں پہنچ جاؤ گے۔"

ہم سب ایک دن اپنی منزل تک پہنچ سکتے ہیں، مگر وہاں پہنچنے کا وقت ہماری محنت اور کوشش پر منحصر ہوتا ہے۔